Komuna e Prizrenit, sikurse shumica e komunave në Kosovë, ka pësuar humbje të mëdha financiare si pasojë e vendimeve gjyqësore dhe procedurave përmbarimore, duke detyruar buxhetin komunal të mbulojë miliona euro për lëndë të humbura në gjykata, shkruan Kujdestari.info.

Komuna e Prizrenit ka paguar miliona euro për vendime gjyqësore të formës së prerë, përfshirë pagesa ndaj zyrave përmbarimore, kompanive private dhe institucioneve të ndryshme.

Këto shpenzime janë shpërndarë pothuajse në të gjitha drejtoritë komunale nga Zyra e Kryetarit, Administrata, Arsimi e Shëndetësia, deri te Shërbimet Publike, Emergjenca dhe Zjarrfikësit duke dëshmuar për një problem sistemik të menaxhimit të kontratave, procedurave dhe kontesteve ligjore.

Komuna e Prizrenit, sipas raportit qe e ka parë Kujdestari.info ka shpenzuar mbi 11 milionë euro gjatë vitit 2025 për zbatimin e vendimeve gjyqësore dhe procedurave përmbarimore, sipas të dhënave zyrtare të paraqitura në Raportin Financiar Janar–Dhjetor 2025.

Të dhënat tregojnë se obligimet që kanë rrjedhur nga kontestet gjyqësore kanë prekur dy kategori kryesore buxhetore investimet kapitale dhe mallrat dhe shërbimet, duke ndikuar drejtpërdrejt në strukturën e shpenzimeve komunale për vitin raportues.

Shuma totale e paguar për vendime gjyqësore është 11,396,084.60 euro. Kjo shumë përbëhet nga dy kategori kryesore:

Investimet kapitale – mbi 7.3 milionë euro

Nga lista e detajuar e pagesave në kuadër të shpenzimeve kapitale, rezulton se 7,343,992.89 euro janë shpenzuar për vendime gjyqësore dhe përmbarime

Këto pagesa janë bërë përmes dhjetëra transaksioneve gjatë vitit, të shpërndara në disa drejtori komunale, përfshirë:

Shërbimet Publike dhe Emergjencën

Administratën dhe Personelin

Kulturën, Rininë dhe Sportin

Arsimin

Shëndetësinë

Shërbimet Sociale

Zhvillimin Ekonomik

Bujqësinë dhe zhvillimin rural

Në disa raste, pagesat individuale kanë arritur mbi 200 mijë euro për një vendim të vetëm, duke treguar peshën e konsiderueshme të këtyre obligimeve në kuadër të projekteve kapitale.

Mallra dhe shërbime – mbi 4 milionë euro

Raporti përfshin gjithashtu një tabelë të veçantë të pagesave të kryera sipas vendimit gjyqësor në kuadër të kategorisë mallra dhe shërbime.

Nga kjo kategori, gjatë vitit 2025 janë shpenzuar: 4,052,091.71 euro për vendime gjyqësore

Këto pagesa lidhen kryesisht me:

kontrata të humbura në gjykatë

përmbarime të detyrueshme

pagesa sipas Thesarit për sektorë si arsimi, shëndetësia dhe shërbimet sociale

 Kush përfitoi më së shumti?

Nga lista e përfituesve të pagesave të lidhura me vendimet gjyqësore, në raport paraqiten në mënyrë të përsëritur disa zyra përmbarimore dhe subjekte juridike.

Sipas shpeshtësisë së transaksioneve dhe vlerave të evidentuara, më së shumti pagesa dhe vlera kumulative rezulton të kenë shkuar drejt:

Permbaruesi Argjent SHPK – me dhjetëra pagesa gjatë vitit, përfshirë edhe pagesa individuale me vlera të larta

Elsa Zyrë Përmbarimore SHPK

BK Partners Zyrja Përmbarimore, si dhe përfitues të tjerë si Agroni SHPK, Reshani Mr, Metaj Enforcement Agent SHPK dhe Alea SHPK

Raporti nuk jep një renditje përfundimtare sipas totalit të përfitimit për secilin përmbarues, por nga numri i lartë i transaksioneve dhe vlerat e shënuara, Permbaruesi Argjent SHPK paraqitet si subjekti me ekspozimin më të madh financiar në këto pagesa.

Ky fenomen nuk e ka prekur vetëm Prizrenin. Pothuajse të gjitha komunat e Kosovës po përballen me pasoja të ngjashme, ku gabimet administrative, kontrata kolektive arsimore, kontratat e dobëta, neglizhenca institucionale apo zvarritjet procedurale përfundojnë me fatura të larta. /Kujdestari.info/