Shumë persona shfrytëzojnë arsyetime të ndryshme për të përfituar në mënyrë të kundërligjshme mjete financiare apo të mira tjera materiale. Kështu kishte vepruar edhe një person i mitur muaj më parë, i cili ishte akomoduar për disa ditë në hotelin ‘Centrum’ në Prizren, raporton Gazeta Sinjali.

Por përpos shërbimet që i mori në hotel e për të cilat nuk pagoi, i mituri arriti që t’i marrë nga pronari i hotelit edhe rreth 700 euro para të gatshme.

Sinjali mëson se i dyshuari këto para i kishte përvetësuar me arsyetimet se i nevojiteshin për shkaqe shëndetësore. Por pas shtatë ditësh qëndrim në hotel, ai ishte zhdukur që aty pa asnjë paralajmërim.

Përballë kësaj situate, pronari i hotelit është detyruar që të kërkojë ndihmën e Policisë së Kosovës, ku ndër të tjera ka deklaruar se i janë shkaktuar rreth 2 mijë euro dëme materiale.
Pas veprimeve hetimore të Policisë, i dyshuari është identifikuar dhe është zbuluar se i mituri është larguar për në shtetin e Malit të Zi.

Më shumë se 4 muaj më vonë, ai u arrit që të arrestohet dhe më pas u shoqërua në stacion policor për intervistim, ku para hetuesve ka pranuar në tërësi veprën për të cilën dyshohet.

Me urdhër të prokurorit, ndaj tij është iniciuar rasti ‘Mashtrim’ dhe i njëjti është dërguar në mbajtje./GazetaSinjali/