Prizreni është komuna e vetme që e drejton Lëvizja Vetëvendosje. Pas ndarjes së Shpend Ahmetit, Vetëvendosjes i ka mbetur ky qytet, vendi ku ky subjekt shënoi revolucion pasi që me vite të tëra ishte nën direktivat e LDK’së e pastaj PDK’së.

Por edhe për këtë kryetar ka pasur fjalë se do e braktis liderin e Vetëvendosjes, Albin Kurtin.

Megjithatë gjithë këto supozime i ka hedhur poshtë vetë kryetari i Prizrenit, Mytaher Haskuka.

Mirëpo, mes tjerash Haskuka potencon se edhe nëse largohet nga politika nuk e lë Vetëvendosjen.

AI më tej ka thënë se Prizreni nuk është prekur fare nga ndarje e VV’së. Përkundrazi ai thotë se ky ndryshim vetëm sa ka rritur partinë atje.

Tutje Haskuka ka theksuar se procesi demokratik brenda Vetëvendosjes nuk është i monopolizuar. Madje ai ka thënë se mohimi i kandidaturës së Albin Kurtit është një akt që mbyt demokracinë.

Ndërkohë i pari i Prizrenit ka thënë se nuk ka qenë fare lehtë të vi në krye të komunës pas qeverisjeve të kaluara.