Aeroporti i Kukësit me koncesion, ministria jep detajet për ofertën e paraqitur
Në tenderin për dhënien me koncesion të aeroportit në Kukës është paraqitur vetëm një ofertë. Ministria e infrastrukturës njoftoi se dy shoqëri shqiptare, Bami shpk dhe Global Tehcnical Mechanics kanë ofruar të investojnë rreth 8 milionë euro për vënien në funksionim të aeroportit.
Sipas marrëveshjes në konsorcium, pjesën më të madhe të aksioneve, 70 për qind do ta ketë Bami shpk dhe Global Technical Mechanics, ndërsa do të zotërojë 30 për qind të koncesionit.
Bami sh.pk është një kompani ndërtimi e themeluar në vitin 1998 dhe zotërohet nga Besnik Bami, ndërsa Global Mechanics është krijuar në mars të vitit të kaluar nga Ridgers Mema.
Të dy kompanitë, nuk kanë eksperiencë në menaxhimin e aeroporteve, por sipas ministrisë, në ofertën e paraqitur, bashkimi i dy shoqërive shqiptare ka dorëzuar edhe një marrëveshje me kompaninë holandeze NACO, e cila ka një eksperiencë të gjerë ndërkombëtare në menaxhimin e aeroporteve.
Sipas Ministrisë së Infrastrukturës, komisioni i vlerësimit të ofertave është duke shqyrtuar në hollësi ofertën dhe brenda pak ditësh do të zyrtarizojë vendimin nëse oferta do të shpallet fituese ose jo.
Aeroporti i Kukësit është përfunduar në vitin 2006, por nuk është vënë asnjëherë në përdorim. Qeveria ka deklaruar se dhënia me koncesion do të mundësojë që përmes këtij aeroporti të fluturojnë mbi 300 mijë udhëtarë në vit me çmime low cost./Top Channel
