Akuza reciproke, ndërsa Universiteti i Prizrenit në kolaps
Zhvillimet e fundit në universitetin “Ukshin Hoti” në Prizren po vazhdojnë të shihen nga kënde të ndryshme nga palët e përfshira në to. Përderisa kryesuesi i Këshillit Drejtues të këtij universiteti, Bedri Muhadri, mbron ligjshmërinë e vendimeve të marra nga ky organ, në anën tjetër Parlamenti Studentor e akuzon atë dhe 3 anëtarët e tjerë për shkelje ligjore e shfrytëzim të benefiteve.
Madje PS-ja ka theksuar se tash e disa muaj universiteti “Ukshin Hoti” ndodhet në kolaps.
Paraprakisht Muhadri ka bërë të ditur se KD i UPZ në mbledhjen e mbajtur më 21 dhjetor 2018 ka zgjedhur u.d. të rektorit, prof. dr. Ismet Temajn, shkruan sot Koha Ditore.
“Tre anëtarë të Këshillit Drejtues, profesorët: Ragip Gjoshi, Artan Nimani, Ylli Kortoqi nuk morën pjesë në mbledhjen e lajmëruar me kohë, me arsyetimin “kinse po solidarizohem me një grup studentësh” të udhëhequr nga Parlamenti Studentor i Universitetit, të cilët më datën 21.12.2018 kanë mbajtur një protestë paqësore, të cilët kanë shfaqur pakënaqësitë e tyre e në mes të tjerash kanë kërkuar nga anëtarët përfaqësues të Senatit në Këshillin Drejtues të Universitetit të mos marrin pjesë në mbledhje, ngase, sipas tyre, Universiteti është në situatë shumë të keqe”, ka thënë Muhadri.
Në anën tjetër Senati i UPZ-së ka mbajtur mbledhje të jashtëzakonshme në lidhje me emërimin e u.d. rektorit. Ai i bën thirrje Prokurorisë të hetojë anëtarët e Këshillit Drejtues të këtij universiteti, pasi sipas tyre kanë bërë keqpërdorim të detyrës zyrtare me zgjedhjen e Temajt UD rektor.
Njoftohet se anëtarët prezent në mënyrë unanime janë pajtuar që organet përkatëse të ushtrojnë ankesë në Inspektoratin e Punës në Prizren dhe MASHT ndaj vendimit të nxjerrë nga 4 anëtarë të KD që e kanë marrë vendimin për I. Temajn.
Po ashtu, Senati ka kërkuar që komisioni në kuadër të UPZ-së të vlerësojë nëse ka konflikt interesi për zgjedhjen e u.d. rektorit Temaj.
Senati i UPZ ka kërkuar nga Ministria e Arsimit, Shkencës dhe Teknologjisë që të shkarkojë anëtarët e KD që janë dërguar nga kjo ministri, pasi sipas tyre ata janë fajtorë pse Temaj është bërë u.d rektor.
Senati në këtë mbledhje ka bërë edhe thirrje që partitë në pushtet të “heqin dorë nga UPZ-ja”.
