Në 6 muajt e parë të këtij viti janë evidentuar 890 raste të reja me kancer në Klinikën e Onkologjisë në Qendrën Klinike Universitare të Kosovës (QKUK).

Në një intervistë për Front Online, drejtori i kësaj klinike, Ilir Kurtishaj tha se ky numër përfshinë të gjitha llojet e tumoreve.

“Brenda gjashtë mujorit të parë janë 890 pacientë të rinj me të gjitha llojet e tumoreve”, tha ai.

Kurtishaj tha për Front Online se brenda ditës trajtohen rreth 350 pacientë.

“Brenda ditës deri 280 pacientë marrin trajtim në Klinikën e Onkologjisë e marrin shërbimin e onkologjisë ditore, ndërsa rreth 100 pacientë trajtohen në rrezatim. Numri total edhe në shërbimin e kimioterapisë dhe radioterapisë kap shifrën 300-350 persona”, tha ai për Front Online.

Ani pse numri është i lartë, QKUK-ja po arrin t’i mbulojë nevojat me barna.

Drejtori Kurtishaj tha për Front Online se Onkologjia është e furnizuar me barna.

“Gjendja aktualisht është stabile, jemi furnizuar me barna koxha mirë, pacientët po marrin vazhdimisht terapinë. Me mungesa të vogla të cilët kanë probleme me operatorët ose probleme me autorizim marketingu, barnat e tjera janë të gjitha. Mbi 85-90% e barnave i kemi në klinikë”, u shpreh ai.

Kurtishaj thotë se Klinika ka mungesë të infermierëve.

Ai shpreson se nga muajt e ardhshëm do të lehtësohet puna me pranimin e infermierëve të rinj.

“Mjekë ka mjaftueshëm, ndërsa pranuar dy infermiere në shërbimin e radioterapisë dhe shpresojmë që në këtë muaj dhe në muajin e ardhshëm edhe katër infermierë në shërbimin e onkologjisë mjekësore dhe do t’i zbusë shumë nevojat tona për personel”, deklaroi ai për Front Online.