Drejtoresha e Arsimit në Prizren, Xhemile Thaçi – Vezgishi, ka marrë vendim për t’i anuluar gjashtë konkurse të hapura paraprakisht nga ish-drejtori tashmë i shkarkuar i arsimit, Gani Gërmizaj.

Kjo bëhet e ditur përmes një vendimi, në të cilin bashkë me numrin konkurseve janë edhe datat e tyre, shkruan “GazetaePrizrenit.net”

Në arsyetimin e drejtoreshës Thaçi – Vezgishi, thuhet se ky hap është ndërmarrë për shkak të shkeljes ligjore gjatë procedurave për formimin e komisioneve përzgjedhëse.

Ndryshe, edhe kryetari i Komunës së Prizrenit, Mytaher Haskukase, në fillim të kësaj jave ka njoftuar se ka anuluar vendimet e Drejtorisë së Arsimit për komisionet përzgjedhëse dhe njëherësh ka shtuar se vendimet e këtyre komisioneve për përzgjedhjen e personelit arsimor janë jovalide.

Për shkak “të parregullsive në konkurse”, Haskuka ditë më parë ka shkarkuar nga detyra drejtorin e Arsimit, Gani Gërmizaj. Pas këtij veprimi, dega e Nismës Socialdemokrate ka njoftuar largimin nga koalicioni qeverisës komunal.

Në anën tjetër, anulimi i konkurseve nga drejtoresha e DKA-së po përcillet me reagime jo vetëm nga të përzgjedhurit, por edhe nga përfaqësues të opozitës në rrjetet sociale./ GazetaePrizrenit.net

Klikoni linkun për vendimin:

https://kk.rks-gov.net/prizren/wp-content/uploads/sites/26/2019/09/anulimi-i-konkurseve-1.pdf