Sindikata e Bashkuar e Arsimit, Shkencës dhe Kulturës në Republikën e Kosovës ka bërë të ditur se Gjykata e Apelit ka miratuar ankesën e tyre, duke prishur kështu aktgjykimin e Themelores në Prishtinë për kompenzimin e orëve të humbura mësimore, ku MASHT obligon personelin arsimor t’i kompensojë orët që ishin humbur gjatë grevës që zgjati tri javë.

Gjykata e Apelit mori vendimin se lënda duhet t’i kthehet shkallës së parë të gjykimit, për rivendosje dhe rigjykim, transmeton Indeksonline.

“Gjykata e Apelit e Kosovës miraton ankesën e SBASHK-ut

“Miratohet si e bazuar ankesa e paditëses SBASHK, ndërsa prishet aktgjykimi i Gjykatës Themelore në Prishtinë- Departamenti për Çështje Administrative A.nr. 552/2019, i datës 25.04. 2019 dhe lënda i kthehet gjykatës së shkallës së parë në rigjykim dhe rivendosje”, thuhet në Aktgjykimin e Gjykatës së Apelit të Kosovës.

 

Një vendim i pa bazuar në ligj i ish ministrit Bytyqi e që kishte të bënte me një urdhër për kompensimin e të gjitha orëve të grevës 3 javore ishte kundërshtuar nga SBASHK-u, që po mbronte vendimin e Këshillit Drejtues të kësaj sindikate që orët e humbura në grevë të mos kompensoheshin.

SBASHK-u iu drejtua Gjykatës Themelore në Prishtinë- Departamentit për Çështje Administrative duke kërkuar drejtësi, por një gjykatëse duke u thirr në emocione, duke qenë edhe në presion nga një debat për orët e humbura në Parlamentin e Kosovës, i cili u shoqërua edhe me akuza të pabaza e me një fjalor rrugësh të ndonjë deputeti, solli vendim që të mbështetet vendimi i ish ministrit Bytyqi.

Ky vendim i gjykatëses trimëroi disa Drejtori arsimore e disa drejtorë shkollash, që nisen me presione nga më të ndryshmet, por mësimdhënësit e Kosovës qëndruan në vendimin Këshillit Drejtues dhe orët nuk u kompensuan.

SBASHK-u duke qenë arsyeshëm i pakënaqur me vendimin Gjykatës Themelore iu drejtua Gjykatës së Apelit të Kosovës me një ankesë në të cilën solli gjithë argumentet se Gjykata e shkallës së parë nuk ka nxjerr vendim të drejtë. Gjykata e Apelit ka sjellë aktgjykimin e saj duke miratuar ankesën e SBASHK-ut dhe duke prishur vendimin e Gjykatës Themelore në Prishtinë- Departamenti për Çështje Administrative A.nr. 552/2019, i datës 25.04. 2019.

SBASHK-u pret nga ata drejtorë të Drejtorive Arsimore dhe nga ata drejtorë shkollash që ushtruan presione ndaj mësimdhënësve për kompensim orësh, që të kërkojnë falje. Pret që ish Ministri Bytyqi dhe KMLDNJ bashkë me Bexhet Shalën, që kërkonin ngritjen e kallëzimit penal ndaj kryetarit të SBASHK-ut dhe nga ata dy a tre deputetë me fjalorë të ulët e plot shpifje e ofendime të pabazuara, që publikisht të kërkojnë falje. E vërteta mund të vonohet, por ajo del në shesh” thuhet në komunikatë.