Policia pak më parë raportoi për arrestimin e zyrtarit përgjegjës të Autoriteti Pyjor në Komunën e Prizrenit, i cili dyshohet për keqpërdorim të pozitës apo autoritetit zyrtar.

Gazeta Sinjali mëson se bëhet fjalë për Izet Osmanajn, i cili dyshohet se ka mundësuar prerjen e 60 metrave kub dru, të cilat iu dhanë një kompanie private.

Ai dyshohet se ka vepruar në kundërshtim me kërkesën e Drejtorisë së Shërbimeve Publike në Prizren, e cila kishte kërkuar që drunjtë të dërgohen në hapësirat e Shërbimit të Pylltarisë.

Edhe një sasi tjetër e drunjëve ishte në proces të prerjes dhe bartjes dhe pritej të dërgoheshin te kjo kompani private.

Andaj, sipas Policisë, ekziston dyshimi i arsyeshëm se personi i dyshuar ka kryer veprën penale ‘Keqpërdorim i pozitës apo autoriteti zyrtar’, nga Neni 414 i Kodit Penal të Republikës së Kosovës.

Prokurori ka urdhëruar që Osmanaj të ndalohet për 48 orë, ndërsa sasia e drunjëve të sekuestrohet.

Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.