Policia e Kosovës pati gjetur një plantacion narkotikësh në fshatin Sferkë të Klinës, gjatë shtatorit të vitit të kaluar, shkruan Gazeta Sinjali.

Meqë rast u patën konfiskuar mbi 1 ton drogë të llojit kanabis, vlera e të cilit shkonte në mbi 5 milionë euro.

Derisa, sot më 5 prill, policia ka arritur të arrestojë një të dyshuar, shtetas i Shqipërisë, për këtë rast.

Këtë e ka konfirmuar, zëdhënësi i Prokurorisë Themelore në Pejë, Shkodran Nikçi.

“Është ndaluar një person në Vërmicë, i cili dyshohet për kultivim të narkotikëve, përkatësisht për kultivimin e mbi 3 mijë kg narkotik në fshatin Sfërkë të Klinës. Është shtetas i Republikës së Shqipërisë. I njëjti është ndaluar me urdhër të Prokurorit të Shtetit, ndërkohë prokurori i shtetit është duke e përpiluar kërkesën për caktimin e masës së paraburgimit”, ka thënë Nikçi.

Derisa, për këtë rast, ka pasur edhe të tjerë të arrestuar.

Në ditën kur policia kishte ndërmarrë aksionin në plantacionin në fjalë, patën arrestuar të dyshuarin Aleks Gerbi, shtetas shqiptar. Ndërkaq, u pat thënë se janë edhe 6 të tjerë të dyshuar.