Margarita Xhepa, një nga figurat më të shquara të kinematografisë dhe teatrit shqiptar, është ndarë nga jeta në moshën 91-vjeçare.

Lajmi i trishtë vjen një ditë pas ditëlindjes së saj, pasi më 2 prill ajo kishte ditëlindjen, të cilën kësaj here e priti e sëmurë në një spital privat edhe ku ndërroi edhe jetë.

Gjatë karrierës së saj të shquar, Xhepa ka interpretuar mbi 150 role në teatër dhe 32 role në kinematografi, duke lënë një trashëgimi të pasur dhe të paharrueshme për artin shqiptar.

Ajo është konsideruar një nga “Zonjat e Mëdha” të teatrit dhe filmit shqiptar, e cila ka shkëlqyer që nga vitet ’60 e tutje.

Nëpërmjet interpretimit të roleve të paharrueshme, Margarita Xhepa ka lënë një shenjë të thellë në kinematografinë shqiptare.

Disa nga rolet më të njohura të saj përfshijnë Zyrakën në “Vitet e para” (1965), Shanon në “Dimri i fundit” (1976), pianistën në “Koncert në vitin 1936” (1978), dhe Lenën në “Tokë e përgjakur” (1976).

Ajo ka interpretuar gjithashtu edhe role të mëdha në dramaturgjinë botërore, si Ofelia në “Hamleti”, vajza e dytë në “Mbreti Lir”, dadoja në “Romeo e Zhuljeta”, dhe mbretëresha Margaret në “Rikardi III”.

Margarita Xhepa është nderuar me çmime të shumta gjatë karrierës së saj, përfshirë “Çmimin e Karrierës” në vitin 2007, për rolin e saj në monodramën “Kënga e mjellmës”.

Po ashtu, ajo ka marrë titullin e nderuar “Artiste e Popullit” për kontributin e saj të jashtëzakonshëm në art.

Ikona e teatrit dhe kinematografisë shqiptare do të kujtohet gjithmonë për angazhimin e saj të palodhur dhe pasionin e jashtëzakonshëm për artin.