Çmontohet trafiku ndërkombëtar i drogës, në mesin e të arrestuarve edhe 16 shqiptarë
24 anëtarë të një grupi kriminal që merrej me trafikim ndërkombëtar të lëndëve narkotike dhe prostitucionit janë arrestuar në Itali. Sipas mediave italiane, ky rrjet kriminal e kishte bazën e tij në qytetin italian, por ishte i lidhur edhe me vendin tonë.
Të arrestuarit, mes tyre 16 shqiptarë, dyshohet se merreshin me trafikim të lëndëve narkotike në territorin italian, por edhe në atë zvicerian. Ata dyshohet gjithashtu se drejtonin një rrjet prostitucioni me vajza të reja kryesisht nga Lindja të cilat kërcënoheshin dhe dhunoheshin.
Mbi 200 policë kanë kryer gjithashtu 40 kontrolle dhe kanë sekuestruar edhe të ardhurat që vinin nga trafiku i drogës me vlerë në miliona euro. Kontrollet u kryen në veri të Italisë në qytete si Bergamo, Monza, Brianza, Torino dhe Verona, raporton TvKlan.
Gjithashtu u gjetën disa apartamente dhe garazhe që shërbenin për ruajtjen e ngarkesave të drogës. Megaperacioni është rezultat i një hetimi të gjatë të nisur në prill 2020, pas një letërporosie ndërkombëtare pas arrestimit flagrant në Zvicër të një italiani, i cili u arrestua teksa transportonte me makinë 6 kilogramë heroinë.
Foto ng arkivi
