Si një ndër kontrolluesit më të mëdhenj të të dhënave personale në Kosovë, Administrata Tatimore e Kosovës (ATK) brenda afatit të përcaktuar ka zbatuar vendimin e Agjencisë për Informim dhe Privatësi (AIP).

Kështu thuhet në një njoftim të Agjencisë për Informim dhe Privatësi, e cila njofton se me vendimin të datës 24.01.2022, ka shqiptuar gjobë kundërvajtëse ndaj Administratës Tatimore të Kosovës për përpunim të kundërligjshëm të të dhënave personale.

“Administrata Tatimore e Kosovës ka ndërmarrë masa të menjëhershme në zbatim të vendimit të AIP-së, duke dëshmuar në këtë rast, gatishmërinë e tyre për respektim të Ligjit Nr. 06/L-082 për Mbrojtjen e të Dhënave Personale. Ligji Nr. 06/L-082 për Mbrojtjen e të Dhënave Personale ka paraparë, që çdo kontrollues, përpunues i të dhënave personale, përpunimin e të dhënave të bëjë në mënyrë të ligjshme në të kundërtën Agjencia për Informim dhe Privatësi, në bazë të kompetencave ligjore është e detyruar të ndërmarrë veprimet dhe masat e duhura deri tek shqiptimi gjobave për mos respektim të dispozitave të parapara në ligj”, thuhet në njoftimin e AIP-së. / IO