Dështimet vazhdojnë. E sot për të 45-n herë me radhë deputetët dështuan ta konstituojnë kuvendin. E vazhdon të përsëritet po i njëjti skenar, që deputetët të mblidhen çdo 48 orë, por pa asnjë rezultat.

Rreth pesë muaj  pas përfundimit të zgjedhjeve, Kuvendi i Kosovës nuk ka arritur ende të konstituohet dhe se asnjëra nga partitë nuk kanë lëvizur nga pozicionet e tyre.

VV-ja nuk heq dorë nga votimi i fshehtë dhe as nga kandidatja e tyre për kryetare të kuvendit Albulena Haxhiu. Ndërkaq partitë opozitare mbetën të palëkundura në kundërshtimin e votimit të fshehtë.

Deputeti i PDK-së Abelard Tahiri i cili mori fjalën tha se sot është hera e  45-të që kryesuesi Avni Dehari po e shkel Kushtetutën e vendit.

“Sot hera e 45-të që kryesuesi po e shkel Kushtetutën”, tha ai, teksa iu ndal mikrofoni. Megjithatë Tahiri vazhdoi fjalimin e tij pa miktrofon.

Sikurse dhe në seancat e kaluara, edhe këtë herë kryesuesi i seancës konstituive, Avni Dehari, kërkoi formimin e një komisioni për mbikëqyrjen e votimit të fshehtë për kryeparlamentar.

Propozimi nuk i mori votat e mjaftueshme dhe seanca u ndërpre për të vazhduar të dielën  në orën 11:00.

Të pranishëm në sallë ishin 93 seputetë,  49 votuan pro, asnjë kundër dhe asnjë abstenim./Indeksonline