43 vjeçari Gani Gashi u godit  për vdekje nga energjia elektrike në Reqan të Suharekës. Policia e Kosovës po e heton rrethanat  se si ka ndodhur rasti. Vendin e ngjarjes e ka mbikëqyr edhe një ekipi i KEDS-it, të cilët kanë thënë se sipas të dhënave preliminare bëhet fjalë për një aksident.

Gani Gashi u godit nga energjia elektrike për vdekje.

43 vjeçari në mbrëmjen e së martës ishte duke tentuar të hapë kanalin e ujit në kompaninë e autobusëve “Shpejtimi” në Reçan të Suharekës.

Bashkë me të ishte edhe bashkëshortja e tij dhe vëllai.

Viktima kishte ardhur për t’i ndihmuar bashkëshortes së tij, e cila sipas dëshmitarëve punonte si mirëmbajtëse në këtë kompani

Familjarët e dërguan në Qendrën Kryesore të Mjekisë Familjare në Suharekë.

Mjeku kujdestar intervenoi por pa sukses.

E të mërkurën, familja Gashi në lagjen “Korillë” të Prizrenit i hapën dyert për të pame.

Megjithatë ata nuk pranuan të flasin para kamerave se si ka ndodhur rasti, vetëm thanë që nuk dijnë më shumë se ajo çfarë u raportua në media.

E për hetime, në vendin e ngjarjes u panë edhe zyrtarë të KEDS-it.

Nga ky institucion thanë se nga vrojtimi preliminar që kanë bërë bëhet fjalë për një aksident.

“Pas shqyrtimit dhe analizimit të gjetjeve në vend, i njëjti do të dalë me një raport përfundimtar. Sipas të dhënave preliminare bëhet fjalë për një aksident, për çka për më shumë detaje ju sugjerojmë t’i kontaktoni autoritetet përkatëse të sigurisë”, thuhet nga KEDS.

Ndryshe, zëdhënësi i Policisë për Rajonin e Prizrenit, Vesel Gashi ka bërë më dije se po hetohen rrethanat e vdekjes.

Mirëpo detaje për rastin nuk dhanë   nga Prokuroria Themelore në Prizren.

Gjatë gjithë ditës, ata nuk kanë kthyer përgjigje për Tëvë1.

Televizioni ka provuar të marrë një qëndrim edhe nga kompania e autobusëve “Shpejtimi” në Suharekë mirëpo as ata nuk i janë përgjigjur interesimit.

43-vjeçari Gani Gashi, do të varroset të enjten në Prizren.