Anëtarë të partive opozitare kanë akuzuar Drejtorinë Komunale të Arsimit në Prizren se nuk ka ndërmarrë masa për largimin e mësimdhënëses së shkollës së muzikës “Lorenc Antoni” nga lista e pagave, duke pretenduar se ajo prej shtatë muajsh nuk i ka mbajtur orët e saj.

Sipas opozitarëve, drejtori i shkollës përkatëse ka dërguar disa shkresa në DKA me kërkesën që të merren masa ndaj mësimdhënëses në fjalë, meqë ajo nuk i ka mbajtur orët mësimore sipas orarit të punës.

Por drejtuesit e DKA-së kanë pohuar se ky rast është ndryshe prej mënyrës se si paraqitet nga opozita, raporton Koha.net.

Ndërsa prindi i mësimdhënëses, një eksponent shumëvjeçar i degës së LDK-së, pretendimet e opozitarëve i ka cilësuar si sulme tendencioze në baza familjare.

Ilir Baldedaj i AAK-së ka akuzuar drejtoreshën e DKA-së se ia ka dhënë kundërligjshëm 7 paga mësimdhënëses së pianos, që njëherësh është vajza e Ridvan Hoxhës së LDK-së.

“Drejtoresha e DKA-së, Xhemile Thaçi-Vezgishi, nuk ka pranuar ta heqë nga sistemi i pagave mësimdhënësen e shkollës ‘Lorenc Antoni’ edhe pse prej shtatë muajsh nuk ka mbajtur orët e saj. Genita Hoxha, është vajza e Ridvan Hoxhës, ish-ushtrues i detyrës në shkollën e mesme të lartë ‘Luciano Motroni’”, ka thënë Baldedaj. Ai ka theksuar se drejtori i shkollës së muzikës, Vesel Krasniqi, ka dërguar mbi shtatë shkresa në DKA për marrjen e masave. “Drejtoresha Vezgishi ka mbyllur sytë duke mos nxjerrë asnjë vendim për ndalesën e pagës dhe për ndërprerjen e kontratës”, ka deklaruar Baldedaj, teksa ka shtuar se ky rast duhet të hetohet nga Prokuroria.

Edhe Leart Batusha nga Nisma Socialdemokrate në rrjetet sociale ka akuzuar zyrtarët e pushtetit lokal se nuk kanë hequr nga lista e pagave mësimdhënësen e sipërpërmendur pavarësisht vërejtjeve të drejtorit të shkollës.

Ndërsa Ridvan Hoxha, duke reaguar ndaj akuzave të bëra në raport me vajzën e tij, ka theksuar se bëhet fjalë për sulme tendencioze në baza familjare, duke shtrembëruar të vërtetën në këtë rast.

“Vajza ime është profesoreshë me titull akademik, e nderuar dhe e përgatitur profesionalisht. Ajo nuk ka marrë pagë pa punuar në asnjë rast, përkundrazi gëzon respektin maksimal kudo që është e angazhuar, kështu është edhe në Shkollën e Muzikës në Prizren”, ka thënë Hoxha, duke shtuar se nxënësit e saj janë shpërblyer në gara të ndryshme.

Sipas tij, në muajin tetor të vitit të shkuar dhe në muajin e shkuar, prindërit e nxënësve që kanë ndjekur orët e pianos te mësimdhënësja Genita Hoxha, me peticion kanë kërkuar që orët të mbahen ditën e shtunë, ashtu që të vijojnë edhe mësimin e rregullt. Ai ka pohuar se këto kërkesa nuk janë marrë parasysh nga drejtoria e shkollës, por njëherësh ka vlerësuar se çështjet në mes të drejtorit të shkollës dhe një mësimdhënësi të caktuar janë çështje të brendshme të shkollës.

Megjithëkëtë, ka shprehur bindjen se sulmet e opozitarëve e shënjestrojnë atë për shkak të angazhimit të deritanishëm politik.

Ndërkohë, në rrjetet sociale ka reaguar edhe drejtori i shkollës së muzikës “Lorenc Antoni”, Vesel Krasniqi, i cili krahas kundërshtimit të pretendimeve e fjalorit të Ridvan Hoxhës, ka shprehur qëndrimin se “askush s’ka të drejtë të punojë veç një ditë në javë e ta marrë pagën e plotë…”. Ai në mes të tjerash ka shkruar se “shkolla nuk është fontanë dëshirash, por institucion shtetëror që ka rregullat dhe ligjet, të cilat unë si drejtor shkolle jam i detyruar t’i respektoj”.

Krasniqi ka shprehur qëndrimin se “ka ikur dita e favoreve politike në kurriz të qytetarëve të shkretë” dhe se ka ardhur dita e barazisë të të gjithëve “para ligjit dhe së drejtës”.

Në anën tjetër, drejtoresha e DKA-së, Xhemile Thaçi-Vezgishi, ka deklaruar se rasti i mësimdhënëses në fjalë është ndryshe nga ajo që është thënë nga individët e caktuar nga opozita, ngase “mësimdhënësja i ka mbajtur orët mësimore, kjo në një marrëveshje paraprake në mes të shkollës-prindërve dhe DKA-së, për një periudhë të caktuar kohore, për të cilën kanë ekzistuar disa arsye (profesionale dhe shëndetësore) dhe specifikat e punës në shkollat profesionale të muzikës, ku orari i punës respektivisht mësimor lejon punën edhe ditëve të shtuna” dhe se “e lartshënuara e ka deponuar në DKA dokumentacionin përkatës”.

Ajo ka shtuar se DKA-ja ka ndërprerë marrëdhënien e punës me mësimdhënësen, me kërkesën e drejtorit të shkollës.

“Duke e vlerësuar që kjo gjendje nuk mund të vazhdojë më tej, përkundër kërkesave të prindërve, me kërkesën e drejtorit të shkollës, DKA-ja e ka ndërprerë marrëdhënien e punës dhe do të bëjë ndalesë në paga për orët mësimore eventuale të pambajtura, sipas specifikimit të drejtorisë së shkollës”, ka përfunduar drejtuesja e DKA-së, Xhemile Thaçi-Vezgishi./koha.net