Në start të fushatës për zgjedhjet lokale, kur qytetarët e Prizrenit presin qartësi, përballje idesh dhe transparencë nga kandidatët për kryetar komune, kryetari aktual Shaqir Totaj duket se ka zgjedhur një rrugë tjetër: të shmanget, shkruan Gazeta e Prizrenit?

Sipas burimeve të sigurta, Totaj nuk ka marrë pjesë në njërin prej debateve më të rëndësishme të kësaj fushate – debatin e organizuar nga gazetarja e njohur Jeta Xharra në kuadër të emisionit “Debat Pernime”, që pritet të transmetohet nesër.

Në anën tjetër ai për sonte ka paralajmëruar se do jetë në një debat televiziv veç me drejtuesin e emisionit. Si duket kryetari ka zgjedhur të paraqitet vetëm në disa emisione të përzgjedhura, ku zakonisht mban monolog, pa pasur përballje me rivalët e tij politikë. Madje, dihet tashmë që disa prej këtyre emisioneve janë të sponsorizuara nga vetë kandidatët apo subjektet politike, çka i jep atyre më shumë ngjyrë propagandistike sesa informative.

Është e pakuptueshme se si një kryetar që kërkon edhe një mandat tjetër, nuk e ndjen të nevojshme të ballafaqohet me kandidatët e tjerë, të japë llogari për katër vitet e kaluara dhe të shpalosë vizionin e tij për të ardhmen e qytetit. Shmangia nga debati është shmangie nga përgjegjësia, dhe qytetarët e Prizrenit këtë nuk duhet ta injorojnë.

Në mungesë të Totajt, edhe kandidati i Vetëvendosjes, Artan Abrashi, ka refuzuar të marrë pjesë në debatin e Xharrës, sigurisht duke mos e parë të arsyeshme të jetë aty pa rivalin e tij kryesor. Kjo e shton edhe më shumë peshën e mungesës së Totajt dhe e kthen atë në një faktor paralizues të diskutimit publik.

Ndërkohë, sipas informacioneve që vijnë nga terreni, sondazhet e fundit flasin për një rritje të përkrahjes për opozitën, në një kohë kur fushata po intensifikohet dhe votuesit po bëhen më kërkues për llogaridhënie.

Qytetarët e Prizrenit meritojnë më shumë sesa fjalime të kontrolluara dhe intervista të lehta. Ata meritojnë përgjigje, përballje dhe guxim politik./ Gazeta e Prizrenit

Lexo edhe:

Grushti që flet më shumë se fjalët: deputeti i VV-së Rexhaj me Nezir Çoçajn – a është një mesazh për Totajn?