Fëmijët asamblistë përfaqësojnë moshatarët e tyre
Në ulëset e Kuvendit të Komunës së Prizrenit krahas kuvendarëve të rritur, herë pas here ulen edhe fëmijët. Ata janë nxënës të shkollave të mesme të ulëta të Prizrenit. Por në të njëjtën kohë përfaqësojnë fëmijët e këtij qyteti. Këtë përfaqësim e bëjnë përmes Asamblesë Komunale të Fëmijëve.

Në këtë trup ata angazhohen për promovimin e të drejtave të fëmijëve dhe ngrenë zërin kundër diskriminimit dhe padrejtësive të ndryshme që bëhen ndaj moshatarëve të tyre, shkruan sot Koha Ditore.

Asambleja Komunale e Fëmijëve në Prizren është themeluar pesë vjet më parë. Ndërsa përbërja e tanishme e AKF-së ka filluar mandatin nga viti 2017. Në krye të këtij trupi aktualisht është nxënësja e klasës së IX-të, Puhiza Shemsidini.

Një prezantim në shkollën e saj mbi rolin e kësaj Asambleje ka mjaftuar për ta bindur atë që të bëhet përfaqësuese e fëmijëve, me qëllim të adresimit të problemeve të përditshme të tyre.

“Kur e kam dëgjuar në shkollën time prezantimin për punën e AKF-së e kam gjetur vendin për adresimin e shqetësimeve, sidomos lidhur me diskriminimin, që në shkollën time kanë qenë të shumta. Njëkohësisht e kam konsideruar veten të denjë që pa ngurrim t’i adresoj problemet e të gjithë moshatarëve të mi”, ka thënë Shemsidini. Ajo ka sqaruar se në shkollë ka vërejtur diskriminim gjinor, sidomos ndaj djemve nga ana e mësimdhënësve, sikurse edhe ndaj nxënësve me aftësi të kufizuara me përdorimin e termeve pezhorative ndaj tyre.

Ajo ka sqaruar se AKF-ja, mandatin e tanishëm e ka filluar në vitin 2017 dhe se përbëhet nga nxënësit e zgjedhur të 13 shkollave të mesme të ulëta të Prizrenit.