Gjykata në Beograd ka caktuar masën e paraburgimit ndaj Avni Qenajt, ish-pjesëtar i Ushtrisë Çlirimtare të Kosovës dhe shtetas i Kosovës, për një periudhë prej 30 ditësh.

Vendimi vjen vetëm disa ditë pas lirimit të Arbnor Spahiut, ish-polic i Njësisë Speciale të Kosovës, i cili u arrestua në qershor të këtij viti në pikën kufitare ndërmjet Hungarisë dhe Serbisë. Avni Qenaj, nga fshati Romajë i Prizrenit, u arrestua nga autoritetet serbe po ashtu për shkak të lidhjeve të tij me UÇK-në.

Lajmi për arrestimin e Qenajt është konfirmuar nga Ministria e Punëve të Jashtme e Kosovës dhe nga Organizata e Veteranëve të Luftës së Ushtrisë Çlirimtare të Kosovës (OVL-UÇK).

Në një njoftim, Ministria e Punëve të Jashtme theksoi se po ndërmerren të gjitha veprimet e mundshme për mbrojtjen e të drejtave dhe sigurisë së Avni Qenajt.