Gjykata e Prizrenit ka marrë një vendim lidhur me masën e sigurisë ndaj burrit që dyshohet se goditi me grushte bashkëshorten e tij.

Në një njoftim të saj, Gjykata thotë se Prokuroria e Prizrenit kishte kërkuar masën e paraburgimit prej një muaji ndaj të pandehurit V.R. nga Prizreni, për shkak të dyshimit të bazuar se ka kryer veprën penale – lëndim i lehtë trupor.

Mirëpo, Gjykata ka caktuar masën e paraqitjes në stacionin policor

“Masa e paraqitjes do të llogaritet prej datës së arrestimit 30.11.2018, dhe do të zgjasë deri më datën 30.12.2018”, thuhet në njoftimin e Gjykatës Themelore të Prizrenit.

Sipas Prokuroris, i dyshuari më 27 dhe 28 nëntor 2018, në orë të pacaktuar, në Prizren, në shtëpinë e tij familjare, me dashje i shkakton lëndim të lehtë trupor të dëmtuarës – bashkëshortes së tij me iniciale V.R., në atë mënyrë që pas një mosmarrëveshjeje të shkurtër rreth tradhtisë bashkëshortore, ku vjen deri te acarimi i situatës dhe i pandehuri me iniciale V.R. e sulmon fizikisht bashkëshorten e tij duke e goditur me grusht në pjesë të ndryshme të trupit, me ç’rast të njëjtës i shkakton lëndime të lehta trupore, si pasojë e dhunës së vazhdueshme, sistematike e dëmtuara detyrohet të largohet nga shtëpia.

Në njoftimin e Gjykatës nuk ka detaje tjera se pse është refuzuar kërkesa e Prokurorise për caktimin e paraburgimit, por nuk sqarohet as fakti se për çfarë rrethanash apo arsyesh të pandehurit iu caktua masa e paraqitjes në stacion policor, e jo paraburgimi siç ka kërkuar Prokuroria.