Më 12 maj është dita e fundit kur institucionet kanë publikuar të dhënat për sëmundjet shoqëruese të pacientëve që janë regjistruar si viktima të COVID-19 në Kosovë. Atë ditë, Kosova ka regjistruar viktimën e 29-të. Ndërkohë, nga ajo datë e deri më 5 korrik, janë raportuar edhe 46 vdekje të tjera, prej të cilave 17 vetëm gjatë vikendit të fundit. Për të gjitha këto raste nuk janë publikuar të dhëna lidhur me atë se cilat kanë qenë sëmundjet që kanë pasur personat që kanë vdekur.
KOHA ka kërkuar të dhëna nga Ministria e Shëndetësisë (MSH), Shërbimi Spitalor, Klinik, Universitar i Kosovës (SHSKUK), si dhe Instituti Kombëtar i Shëndetësisë Publike të Kosovës (IKSHPK), por që nga e mërkura e javës që shkoi ata nuk kanë kthyer përgjigje lidhur me atë se cilat janë sëmundjet më të shpeshta të personave që kanë humbur betejën me COVID-19. (Artikullin e plotë mund ta lexoni në gazetën Koha Ditore).
