Ky vendim u mor nga gjykatësja Ajser Skenderi, në seancën e mbajtur të enjten, në Gjykatën Themelore në Prizren, raporton “Betimi për Drejtësi”.

Mehmeti, Shala dhe Rexhepi, akuzohen se si persona përgjegjës, anëtarë të komisionit, i kanë dhënë mundësi Shoqatës së Familjeve të Dëshmorëve dhe Shoqatës së Invalidëve të UÇK-së, që të përpilojnë lista dhe në bazë të tyre, tu jepet e drejta e përfitimit të shfrytëzimit të banesave pa e bërë fare verifikimin e tyre, kështu duke i privuar nga kjo e drejtë familjet skamnore, të cilat sipas akuzës, i kanë plotësuar këto kritere.

Propozimi për dëgjimin e ish-kryetarit Muja, në cilësi të dëshmitarit, u bë nga mbrojtësi i të akuzuarit Mehmeti, avokati Esat Gutaj, me arsyetimin e sqarimit të rrethanave, se kush i ka marrë ato vendime dhe kush i ka zbatuar .

Kërkesa në fjalë u kundërshtua nga mbrojtësja e të pandehurit Rexhepi, avokatja Bahrije Besimi.

“Ne nuk jemi kompetent të vendosim për ligjshmërinë e vendimeve, të cilat janë marrë në Asamblenë e atëhershme Komunale. Konsideroj se ato janë të ligjshme dhe anëtarët të cilët janë caktuar nga personat kompetent, për ndarjen e banesave, i kanë kryer detyrat sipas rregullativës dhe dispozitave ligjore, për çka edhe janë caktuar” , tha ajo.

Në anën tjetër, mbrojtësi i të akuzuarit Shala, avokati Besim Koqinaj deklaroi se një vendim të tillë e lë në dorë të gjykatës, duke mos shtuar asgjë lidhur me kërkesën e avokatit Gutaj.

Kërkesa në fjalë u aprovua nga kryetarja e trupit gjykues, gjykatësja Skenderi, e cila bëri të ditur se përpos ish-kryetarit Muja, në cilësi të dëshmitares do të dëgjohet edhe ish-drejtoresha e Mirëqenies Sociale, Fahrije Bytyqi.

Përveç kësaj, në seancën e së enjtes, i akuzuari Shala i ka propozuar gjykatës që gjatë procedurës së provave, të administrohet si provë edhe vendimi për ri konfirmimin e vendimit të Kuvendit.

Ndryshe, në seancën e së enjtes ka munguar ka munguar përfaqësuesi i Komunës së Prizrenit, Selman Sokolaj, për të cilin gjykata ka fakte se ka qenë i ftuar në mënyrë të rregullt, mirëpo mungesën e tij nuk e ka arsyetuar, raporton “Betimi për Drejtësi”.

Prezent në gjykatë nuk ishin as dëshmitaret Hamdije Ademaj dhe Gjyhere Maqkaj.

Seanca e radhës për këtë rast u caktua të mbahet më 16 dhjetor 2019, në ora 10:00.

Ndryshe, sipas aktakuzës së Prokurorisë Themelore të Prizrenit të ngritur më 8 mars 2019, të akuzuarit Mehmeti, Shala dhe Rexhepi, ngarkohen se gjatë vitit 2013, nuk i përmbushin detyrat e tyre zyrtare me qëllim të përfitimit të dobisë për personin tjetër, apo që t’i shkaktojnë dëm personit tjetër.

Organi i akuzës, ata i ngarkon se duke qenë pjesë e komisionit për vërtetimin e kushteve të banimit dhe përcaktimin e përfituesve të të drejtës së shfrytëzimit të banimit, të njëjtit nuk i përmbushin detyrat e tyre dhe me këtë rast, sipas akuzës, i kanë dhënë mundësi Shoqatës së Familjeve të Dëshmorëve dhe Shoqatës së Invalidëve të UÇK-së, që të përpilojnë lista dhe në bazë të tyre, tu jepet e drejta e përfitimit të shfrytëzimit të banesave pa e bërë fare verifikimin sipas udhëzimit administrativ nr 21/2010, për përcaktimin e radhës së përparësisë për kategoritë e familjeve që mundë të përfitojnë nga programet e veçanta të banimit.

Në aktakuzë thuhet se me këtë rast aplikuesit nga radha e familjeve të dëshmorëve kanë përfituar 82 banesa, aplikuesit nga familjet e luftës së UÇK-së kanë përfituar pesë banesa, familjet e veteranëve të luftës dy banesa, ndërsa nga radhët e familjeve skamnore kanë përfituar vetëm tre banesa.

Për ndërtimin e këtyre banesave kishte marr vendim Komuna e Prizrenit, e cila edhe i kishte caktuar anëtarët e komisionit.

Me këtë, sipas Prokurorisë Themelore në Prizren, ata akuzohen se kanë kryer veprën penale “keqpërdorim i pozitës apo autoritetit zyrtar”, nga neni 422, par 1, e lidhur me nenin 31 të Kodit Penal të Republikës së Kosovës (KPRK). /Betimipërdrejtësi