Reagimi i plotë i Besnik Krasniqit

Auditimi i ZKA ka zbuluar se prona e dhënë me qira në Tregun “Bajram Curri” është shndërruar në shembullin më të qartë se si Komuna e Prizrenit e ka nëpërkëmbur interesin publik.

Unë në atë kohë i kam ndëshkuar disa prej ish-kuvendarëve të partisë sime, të cilët sot edhe nuk janë më pjesë e jona, pikërisht për këtë vendim të turpshëm. Prona publike nuk është pazar privat!

MAPL ka konstatuar se vendimi i Kuvendit për dhënien me qira nuk ishte në përputhje me ligjin, duke anashkaluar qëllimin e investimit dhe përfitimin ekonomik për qytetin. Në vend që aty të ndërtohej objekti i paraparë për ruajtjen dhe konservimin e produkteve bujqësore, siç thuhej në kontratë – përfituesi i pronës ka ngritur lokale afariste private.

Zyra e Auditimit këto raste i ka dërguar në Prokurorinë Speciale, dhe shumë shpejt presim aktakuza për zyrtarët e lartë të Komunës dhe për kryetarin në ikje.

Pra, një hapësirë e menduar për fermerët dhe bujqësinë e Prizrenit, është kthyer në pronë për pak duar, pa asnjë përfitim real për qytetarët.

Prizreni nuk ka nevojë për “pazare të fshehta”, por për menaxhim të drejtë e transparent të pronës publike – sepse prona e qytetit është pasuria e të gjithëve, jo privilegj i të paktëve!