Një person ka humbur jetën si pasojë e një aksidenti të rëndë në trafik që ka ndodhur mbrëmë rreth orës 19:00 në fshatin Randobravë të Prizrenit. Këmbësori ndërroi jetë në vendin e ngjarjes, pasi u godit nga një veturë që po lëvizte në drejtim të fshatit Krushë, raporton Gazeta Sinjali.

Sinjali mëson se viktima është Blerim Sezairi, 40-vjeçar.

Vdekjen e të ndjerit e ka konstatuar mjeku që doli me ekipin e Emergjencës në vendin e ngjarjes, teksa trupi i pajetë me urdhër të prokurorit është dërguar në Institutin e Mjekësisë Ligjore për obduksion.

Burimet e Gazetës Sinjali kanë bërë me dije se deri te aksidenti dyshohet të ketë ardhur për shkak të mospërshtatjes së shpejtësisë me kushtet e rrugës.

Ndryshe, rastin e ka konfirmuar edhe Policia e Kosovës përmes raportit 24 orësh, bëhet e ditur se shoferi që dyshohet se shkaktoi aksidentin, është dërguar në mbajtje.

I riu është arrestuar dhe është shoqëruar në stacion policor, ku pas intervistimit me urdhër të prokurorit është dërguar në mbajtje.

Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.