Lidhja Demokratike e Kosovës(LDK), po e shqyrton mundësin e prishjes së koalicionit qeverisës me Vetëvendosjen dhe Nismën në Prizren, transmeton RTV “Besa”.

Kuvendari i LDK-së Petrit Hoxha ka thënë se duhet të rishikohet koalicioni, pasi që kryetari i Komunës, Mytaher Haskuka nuk ka reflektuar.

“Elektorati ynë ka pakënaqësi të madhe me këtë koalicion, sepse kryetari nuk ka reflektuar për bashkëpunim”, tha Hoxha.

“Kemi menduar se kjo qeveri do të jetë më ndryshe se tjerat”.

Mospajtimet e tyre kanë dal në pah në seancën e jashtëzakonshme të Kuvendit Komunal.

Ajo u bojkotua nga kuvendarët e LDK-së.

Kryetari i Prizrenit, Mytaher Haskuka ndërkaq ka thënë se bojkotuesit bllokuan votimin për donacionin MAPL-së.

“Për shkak të mospjesëmarrjes së një numri të madh të asambleistëve në Kuvend, Komuna jonë sot ka humbur një donacion në vlerë prej 350,000 Euro nga MAPL. Fjala është për projektin e ndërtimit të rrugës Smaç – Mamushë, ku përfitues kryesorë do të ishin qytetarët e rajonit të Anadrinit dhe tërë komunës Prizrenit”, shprehet Haskuka, shkruan “PrizrenPress”.

“Është krejtësisht e pakuptueshme që projektet infrastrukturore për të cilat komuna jonë ka aq shumë nevojë, të bojkotojnë vetë asamblistët e Prizrenit, të cilët mandatin e kanë marrë nga qytetarët”.

“Posaçërisht është e papranueshme sjellja e disa asamblistëve nga subjektet e koalicionit të cilët i janë bashkangjitur strategjisë opozitare”.

“As opozitarizmi e as interesat personale, në asnjë rast nuk guxojnë të jenë mbi interesat e qytetarëve të Komunës së Prizrenit”.