Mbahet testi kualifikues i kandidatëve për prokurorë
Këshilli Prokurorial i Kosovës (KPK) ka mbajtur sot testin kualifikues, si pjesë e procesit të rekrutimit dhe emërimit të 21 prokurorëve të rinj në prokuroritë themelore të Kosovës.
Testi u zhvillua në ambientet e Akademisë së Kosovës për Siguri Publike në Vushtrri, ku morën pjesë gjithsej 330 kandidatë.
“Në respektim të parimit të transparencës, llogaridhënies dhe barazisë në qasje, pyetjet e Testit Kualifikues janë hartuar sot, në ditën e testimit, në prani të vëzhguesve dhe monitoruesve vendorë e ndërkombëtarë, me qëllim të garantimit të integritetit dhe besueshmërisë së procesit të rekrutimit”, thuhet në njoftimin për media të KPK-së.
Testi u mbikëqyr personalisht nga kryesuesi i Komisionit, Ardian Hajdaraj, së bashku me anëtarët e tjerë të Komisionit. Procesi u monitorua edhe nga partnerë vendorë dhe ndërkombëtarë, përfshirë Misionin e Bashkimit Evropian për Sundimin e Ligjit (EULEX) dhe Institutin e Kosovës për Drejtësi (IKD).
Pas këtij testi, procesi i rekrutimit do të vazhdojë me testin me shkrim dhe intervistimin e kandidatëve, duke u zhvilluar “në përputhje me standardet më të avancuara të meritokracisë, profesionalizmit dhe paanësisë, të garantuara me legjislacionin përkatës dhe praktikat më të mira ndërkombëtare në fushën e prokurorisë”.
P.S. Foto në ballinë nga arkivi
