Posedimi i armëve ilegale është një dukuri shqetësuese në vendin tonë, pasi që Policia vazhdimisht has në persona të armatosur të cilët cenojnë sigurinë e qytetarëve dhe rrezikojnë jetën e tyre. Ata shpesh kapen në flagrancë me armët, me të cilat sillen lirshëm, raporton Gazeta Sinjali.

Një rast i tillë, jo fort i zakonshëm ka ndodhur dje në Prishtinë, ku në një objekt në ndërtim në rrugën “Kosturi”, është gjetur një armë zjarri me shurdhues.

Burimet e Sinjalit kanë bërë me dije se dy punëtorë të një kompanie të internetit kanë hasur në një armë zjarri me shurdhues, derisa po punonin në bllokun A5 të një objekti në ndërtim.

Ata kanë njoftuar se arma ishte vendosur brenda një dollapi të kabllove të internetit.

Bëhet fjalë për një pistoletë P.Beretta, e cila ishte e pajisur me shurdhues si dhe një karikator me 6 fishekë.

Në vendin e ngjarjes kanë dalë njësitet përkatëse të hetimeve, të cilët kanë konfiskuar armën si dhe provat tjera materiale.

Të njëjtat burime kanë bërë me dije se arma do të dërgohet për ekzaminim balistik dhe krahasim me të dhënat që disponon policia, për të verifikuar nëse korrespondon me ndonjë armë që është përdorur në krimet që janë objekt hetimi.

Në lidhje me rastin është njoftuar edhe Prokurori dhe më urdhër të tij rasti është inicuar si “Armëmbajtje pa leje”.

Hetimet për zbardhjen e rrethanave të këtij rasti janë duke vazhduar, ku pritet edhe identifikimi i personit që e kanë lënë armën në atë vend.