Bashkatdhetarët që tashmë kanë filluar të vijnë në vendlindje, një pjesë e tyre po e shfrytëzojnë pikëkalimin kufitar në Vërmicë për të ardhur në Kosovë.

Pavarësisht numrit të madh të atyre që po e shfrytëzojnë këtë pikëkalim kufitar, aty nuk raportohet për radhë të gjata të pritjes. Ndërsa edhe në pikën e pagesave të sigurimit të automjeteve me targa të huaja pritja është minimizuar deri në 1 minutë e gjysmë.

Policia kufitare është duke punuar me kapacitete maksimale, pasi përveç bashkatdhetarëve ka edhe shumë udhëtarë të tjerë që nga Kosova udhëtojnë drejt bregdetit shqiptar për të pushuar.

Në Vërmicë është vendosur edhe pikëndalesa për pagesat e policave të sigurimit. As këtu nuk ka pritje të gjata, ndonëse bashkatdhetarët ankohen se edhe pse e paguajnë sigurimin, kompanitë nuk u janë përgjigjur incidenteve të tyre gjatë kohës së qëndrimit në Kosovë.

Ndërkohë përfaqësuesi i Byrosë Kosovare të Sigurimit, Agron Berisha, tha se, duke pasur parasysh përvojën e vitit të kaluar, ku ka pasur mjaft pritje , këtë vit i kanë marrë të gjitha masat që kjo mos të ndodhë.

Pavarësisht ankesave të bashkatdhetarëve Berisha tha se për dy vjet sa funksionojnë, për aksidente të automjeteve me regjistrime të huaja kompania ka paguar dhjetëra milionë euro dëme dhe nuk ka mbetur dëm pezull deri më tani./rtklive