Pandemia e COVID-19 u ka pamundësuar banorëve këtu në Rahovec që të mblidhen siç bëjnë tradicionalisht për të festuar ardhjen e pranverës.

E njohur si festa e Shëngjergjit, një ritual pagan që nderon ardhjen e pranverës, viteve të tjera mbledh qindra njerëz në këtë vend, në fshatin Patoqan i Poshtëm të Rahovecit.

Derisa kryetari i Komunës së Rahovecit, Smajl Latifi, thotë se së bashku me Policinë e Kosovës kanë marrë masa që të mos ketë grumbullime të njerëzve, raporton KOHA.

Një tjetër vend që vizitohet më 5 e 6 maj është edhe kjo tyrbe në fshatin Krushë e Vogël e Prizrenit, por prapa kamerës banorët kanë thënë se aty nuk ka pasur fluks të madh të njerëzve.

I qetë e me pak lëvizje të qytetarëve ishte edhe parku i qytetit në Prizren, që çdo vit, më 5 maj shfrytëzohet nga shumë qytetarë të kësaj ane për këtë festë.

Por, lëvizje të shpeshta të qytetarëve u panë në shëtitoren e Prizrenit. Kryetari i Komunës, Mytaher Haskuka tha se Inspektorati komunal dhe Policia kanë qëndruar në terren për të mos lejuar grumbullimin e njerëzve.

Në të gjithë Kosovën që nga e hëna është shtuar qarkullimi i njerëzve, prej kur edhe u lehtësuan masat e institucioneve për parandalimin e COVID-19.

P. S Foto nga interneti