Sipas raportimeve, një person nga Prizreni ka qenë në mesin e viktimave që humbën jetën tragjikisht në vendin e punës në Vjenë, Austri.  Në një kantier ndërtimi në lagjen Alsergrund të Vjenës, humbi jetën edhe 49-vjeçari nga Prizreni, Asllan Musliu, i lindur në Zapllugje të Dragashit.

Lajmi për ndarjen e tij nga jeta është bërë i ditur nga familjarë dhe miq përmes njoftimeve mortore në rrjetet sociale. I ndjeri ishte veteran i UÇK-së dhe njihej si një njeri i respektuar në komunitet.

Nga tri viktimat kosovare të konfirmuara, është përmendur edhe Pajtim Bajrami nga Klina e Poshtme.

Ambasada e Republikës së Kosovës në Austri ka bërë të ditur se, sipas konfirmimeve të fundit, edhe viktima e tretë nga katër viktimat e aksidentit tragjik është shtetas i Republikës së Kosovës.

Bëhet fjalë për shtetasin Istref Zekaj.

Paraprakisht, Ambasada kishte konfirmuar vdekjen e Asllan Musliut dhe Pajtim Bajramit.

Ky rast ka prekur thellë familjet, miqtë dhe gjithë ata që i njohën, duke lënë pas dhimbje të madhe dhe pikëllim në vendlindje dhe në diasporë.

Lexo edhe:

Prizren: Mungesë hapësirash në varreza, problem edhe rezervimi i vendeve nga familjarët – reagon “Eko Regjioni”