Sot bëhen pesë vjet që prej kur u nda nga jeta njeriu që la gjurmë të pashlyeshme në historinë e futbollit të Kosovës, kryetari i parë i Federatës së Futbollit të Kosovës, Agim Bytyqi.

Emri i tij do të mbetet përgjithmonë i lidhur me kohën e vështirë të fillimeve tona, me guximin për të ndërtuar institucionin e futbollit në rrethana okupimi, kur çdo hap kërkonte përkushtim, vizion dhe sakrificë.

Agim Bytyqi dhe bashkëpunëtorët e tij ishin themeluesit e rrugëtimit tonë si futboll i pavarur. Ata krijuan themelet mbi të cilat sot qëndron me dinjitet e përgjegjësi FFK-ja moderne, një federatë që përfaqëson Kosovën në arenën ndërkombëtare dhe i jep kuptim ëndrrës së shumë gjeneratave.

Kujtimi për Agim Bytyqin nuk lidhet vetëm me historinë, por me frymën e tij punëtore, idealin për liri, e dashurinë e madhe për futbollin dhe vendin. Ai ishte njeri i urtë, vizionar dhe guximtar, që me vepra tregoi se futbolli mund të jetë edhe mjet rezistence, por edhe shpresë për të ardhmen.

Në këtë përvjetor, e kujtojmë me nderim dhe falënderim për kontributin e tij të jashtëzakonshëm.

Vizioni dhe vendosmëria e tij do të mbeten përherë udhërrëfyes për brezat që do të vazhdojnë ta ndërtojnë historinë e futbollit tonë.

I përhershëm kujtimi për Ty, miku im! /

Nga Agim Ademi, kryetar i FFK-së

P. S Agim Bytyqi pos qe ka qen kryetari parë i Federatës së Futbollit, pas Pavarësimit, ka qenë kryetar shumë vjeçar i klubit Liria, para e pas luftës.