Prishtina ka treguar se e ka seriozisht mbrojtjen e trofeut të DigitAlb Kupës së Kosovës pasi e ka demoluar Lirinë me rezultat 4-0 në stadiumin “Përparim Thaçi” në Prizren.

Prishtina ishte dominuese në Prizren nga fillimi i takimit duke u pamundësuar secilën gjasë vendasve për të bërë ndonjë gjë, ndonëse ishin mbledhur mjaft shikues në stadium.

Dominimi i madh i kryeqytetasve u kurorëzua në minutën e 41 kur Ergyn Ahmeti me një pasim të mrekullueshëm e gjen Meriton Korenicën, i cili nga afërsia shënoi bukur me të majtën për 1-0. Ishte ky goli i dytë në dy ndeshjet e fundit për ish-kapitenin e Lirisë i cili nuk festoi në respekt të tifozëve vendas.

Nuk vonoi shumë dhe asistuesi e futi veten në listën e realizatorëve. Ergyn Ahmeti pranoi një pasim të bukur nga Basit Khalid, duke shënuar përballë portierit vendas për 2-0 (45’).

Liria nisi më mirë pjesën e dytë duke pasur një lloj dominimi, pa ndonjë rast konkret para portës, duke krijuar ndonjë shqetësim për mbrojtjen më të mirë në Kosovë, shkruan zeri.info.

Kjo bëri që Arbër Hoxha në minutën e 64 të jetë në pozitë të pastër shënimi, por Flamur Gashi ishte ai që mohoi golin e tretë.

Ai që asistoi te goli i dytë, Basit Khalid (73′), shënoi për 3-0 duke shfrytëzuar një gabim të mbrojtjes vendase dhe duke vulosur kështu fitoren.

Në minutat e fundit (89′) ishte sërish Khalid ai që shfrytëzoi vendasit e demotivuar për të realizuar për 4-0.

Me këtë fitore Prishtina kalon në çerekfinale të DigitAlb Kupës së Kosovës, trofe të cilin synon ta mbrojë./zeri