Prizren: Bie shkalla e realizimit të investimeve kapitale
Realizimi i buxhetit komunal të Prizrenit për periudhën nëntëmujore dhe gjashtëmujore të këtij viti ka ngjallur pakënaqësi tek anëtarët e Kuvendit të Komunës. Këshilltarët e KK-së kanë theksuar se trendi i shpenzimit të mjeteve veçanërisht te investimet kapitale nuk është i kënaqshëm në periudhat raportuese.
Madje edhe kuvendarët nga radhët e partive të koalicionit qeverisës i kanë bërë thirrje kryetarit Mytaher Haskuka që të kërkojë përgjegjësi nga drejtorët për realizimin e buxhetit të vitit 2019 në përputhje me vendimmarrjen e Kuvendit, shkruan sot Koha Ditore.
Në mbledhjen e fundit të KK-së së Prizrenit, Zenel Ahmetaj, nga Drejtoria e Financave, ka paraqitur raportet financiare për periudhën janar-qershor dhe për periudhën janar-shtator 2019.
Sipas raportit të DF-së, në gjashtëmujorin e parë të ardhurat e alokuara kanë qenë 32.5 milionë euro nga 50.51 milionë euro të parashikuara, me ç’rast janë shpenzuar 18 milionë euro ose 36 për qind e shumës së planifikuar.
