Prizren: Në mbylljen e përkohëshme të Kino Lumbardhit – Kurti: Rrugëtimi do të vazhdojë edhe për dekada
Kryeministri në detyrë, Albin Kurti, ka marrë pjesë në ceremoninë “Edhe një herë deri herën tjetër”, të organizuar nga Fondacioni “Lumbardhi” në Prizren, me rastin e mbylljes së përkohshme të ndërtesës së kinemasë për shkak të renovimit, shkruan Gazeta Sinjali.
Në fjalimin e tij, Kurti kujtoi se Kino Lumbardhi ka qenë shtëpia e edicionit të parë të Festivalit Ndërkombëtar “DokuFest” në vitin 2002 dhe e quajti këtë institucion një monument të rëndësishëm të trashëgimisë kulturore që do të vazhdojë të jetojë për dekada të tjera.
“Rrugëtimi i Kinemasë Lumbardhi, nga një simbol i reformës shoqërore në vitet ’50, deri në shënjues të kujtesës kolektive dhe triumf të aktivizmit qytetar, është dëshmi e gjallë e rëndësisë së saj për kulturën dhe shoqërinë”, tha Kurti.
Ai shtoi se Lumbardhi, si emër i kinemasë dhe si lum që përshkon qytetin, simbolizon rrjedhën e jetës dhe artit në Prizren, duke përmendur edhe festivalet që gjallërojnë qytetin, si “Zambaku i Prizrenit” dhe “DokuFest”.
“Kinemaja Lumbardhi dhe lumi që i dha emrin janë të pandashëm në historinë e jetës kulturore të qytetit tonë,” u shpreh ai në fund.
