Gjykata Themelore në Prizren, Departamenti i Krimeve të Rënda, ka aprovuar kërkesën e Prokurorisë Themelore të Prizrenit, për caktimin e masës së paraburgimit, ndaj të pandehurit R.R., për shkak të dyshimit të bazuar se ka kryer veprën penale dhënie ryshfeti nga 422 par.1 të Kodit Penal të Republikës së Kosovës.

Sipas njoftimit, gjyqtarja e procedurës – Teuta Krusha, kërkesën e prokurorit të shtetit për caktimin e masës së paraburgimit kundër të pandehurit e ka aprovuar si të bazuar konform dispozitave të KPPRK-së dhe të njëjtit i është caktuar masa e paraburgimit në kohëzgjatje prej një muaj, ashtu që kjo masë të pandehurit do t’i llogaritet prej datës 27.01.2021 deri me datën 27.02.2021, raporton “Betimi për Drejtësi”.

Gjykata me rastin e caktimit të paraburgimit ndaj të pandehurit R.R., ka vlerësuar se ekzistojnë arsyet ligjore për caktimin e masës së Paraburgimit, dhe nga provat e mbledhura deri në këtë fazë.

Sipas njoftimit, rrjedh dyshimi i bazuar se me datë 27 janar 2021, rreth orës 22:40 minuta, i pandehuri R.R., në mënyrë të drejtpërdrejtë i ofron personit zyrtar dhe atë oficeres – zyrtare policore pranë PKK në “Vërmicë”, shumën e të hollave prej dyzetë euro (2 x 20), si dhuratë të paarsyeshme në mënyrë që personi zyrtar të mos veproj në pajtim me detyrën e saj zyrtare, në atë mënyrë që derisa e njëjta – oficerja ka qene duke bërë kontrollimin dhe regjistrimin e dokumenteve, ndalet për kontrolle automjeti me tabela të Shqipërisë, të cilin ka qenë duke e drejtuar A.D., shtetas i Republikës se Shqipërisë, ndërsa si bashkudhëtar ka qenë këtu i pandehuri R.R.,  i cili  ne dokumentet e tij kishte vendosur kartëmonedhat e cekura si më lartë dhe ne pyetjen e zyrtares policore çfarë janë këto të holla, ai është përgjigjur “se janë për të pirë një kafe”, dhe ketë për arsye se kishte tentuar dy herë me herët për të kaluar kufirin, por ishte kthyer nga zyrtarët policor pasi nuk posedonte kartën e identitetit.

Siapas njoftimit, Gjykata ka vlerësuar se janë përmbushur kushtet ligjore për caktimin e paraburgimit, sepse i pandehuri me qëndrimin në liri mund të fshihet apo të jepet në arrati me qëllim të shmangies nga përgjegjësia penale, ngase i njëjti është shtetas i Republikës së Shqipërisë, nuk ka ndonjë punë të rregullt e as vendbanim në territorin e Republikës së Kosovës. Andaj duke marrë parasysh këto rrethana i njëjti mund të jetë i paarritshëm për organet e ndjekjes, ashtu që qëndrimi i të pandehurit në masën e paraburgimit është më se i arsyeshëm dhe i domosdoshëm në këtë fazë të procedurës penale, për zbatimin me sukses dhe efektiv të procedurës penale.

Në njoftim thuhet se, kundër këtij vendimi, pala e pakënaqur ka të drejtë ankese, përmes Gjykatës Themelore në Prizren, Gjykatës së Apelit në Prishtinë. Ankesa nuk e pezullon ekzekutimin e këtij aktvendimi. /BetimipërDrejtësi