Kampi i Prizrenit ku ishin strehuarit personat që iu larguan tërmetit në Shqipëri, është boshatisur.

Kryeministri në detyrë I Kosovës, Ramush Haradinaj, njoftoi se drejt Shqipërisë janë kthyer edhe personat e fundit që ishin në këtë park dhe ata që ndodheshin në shkollën “Gjon Buzuku” të së njëjtës komunë.

“Në këtë mënyrë, u mbyll edhe kjo etapë e akomodimit dhe strehimit në objektet publike”, ka thënë Haradinaj. Ai shtoi se merr çdo ditë raporte nga institucionet për rikthimin e personave të cilët qëndruan në shtëpi private apo dhe objekte hoteliere në Kosovë.

Haradinaj falënderoi të gjithë qytetarët për kontributin dhe angazhimin që patën në ndihmë bashkëkombësve nga Shqipëria pas tërmetit me pasoja tragjike. Një falenderim, kryeministri në largim e pati edhe për institucionet e Shqipërisë për bashkëpunimin e tyre, për vullnetarët e shumtë apo organizatat joqeveritare. Ai tha se do të vazhdojnë të jenë të gatshëm për çdo nevojë të mëtejshme që mund të ketë qeveria shqiptare. /GazetaExpress/