Të martën në mëngjes, ka shpërthyer një zjarr në afërsi të fshati Jeshkovë, duke djegur vreshta dhe sipërfaqe të tëra pyjore. Nazim Berisha së bashku me bashkëshorten e tij, është angazhuar në shuarjen e zjarrit i cili kishte shpërthyer në vreshta e më pas duke u përhapur edhe në pyjet e fshatit Jeshkovë.

Ai thotë se në ora 09:00 të mëngjesit, duke u kthyer në shtëpi nga fshati Hoçë e qytetit kishte parë flakën dhe mënjeherë kishte ardhur në vendin ku kishte shpërthyer zjarri për ta shuar atë me ujë nga një burim që ndodhej afër. Pas tij, në vendngjarje kishin ardhur edhe pjesëtarë të brigadës së zjarrfikësve të Prizrenit, por nuk kishin mundur që afër vatrave të zjarrit të sjellin edhe automjetin e tyre, raporton Televizioni i Prizrenit.

Ai thotë më tej se si pasojë e shpërthimit të këtij zjarri të madh, po dëmtoheshin sipërfaqe të tëra të vreshtave dhe pyjeve, ndërsa zjarri rrezikonte të digjte edhe antenat e operatorëve mobil që ndodheshin afër, e problem më të theksuar paraqiste era që frynte në masë të konsiderueshme duke përhapur zjarrin gjithandej.

Për momentin nuk dihen arsyet e vërteta që shkaktuan shpërthimin e këtij zjarri, ndërsa dyshohet se zjarri është shkaktuar sërish nga dora e njeriut. Ndryshe, ditëve të fundit në Prizren dukuria e zjarreve është mjaft e theksuar, andaj do ishte mirë që organet përkatëse të merren me këtë çështje, pasi dëmet janë të konsiderueshme.