Prokuroria Themelore e Prishtinës ka mohuar raportimet se është hapur një grup tjetër me përmbajtje të ngjashme me atë të grupit famëkeq “Albkings”, raporton Gazeta Sinjali.

Në një njoftim zyrtar, Prokuroria ka bërë të ditur se, në bashkëpunim me Policinë e Kosovës, ka përcjellë nga afër çdo informacion që lidhet me mundësinë e rihapjes së këtij grupi apo grupeve të tjera me përmbajtje të ngjashme.

Sipas tyre, të gjitha këto informacione, pas verifikimeve të kryera, kanë rezultuar të pavërteta.

“Prokurori i Shtetit ka përcjellur me vëmendje në vazhdimësi publikimet e ndryshme mediatike në lidhje me këtë rast, në veçanti këtu edhe së fundi publikimin e lajmit në portalin “Insajderi” me titull “Shtetit i iki Edin Nevzadi, rihapet një grup tjetër sikur “Albkings”/Pamjet tronditëse” dhe njofton publikun se lajme të tilla janë të pavërteta”, shkruhet në njoftimin e Prokurorisë.

Grupi “Albkings” u mbyll në maj të vitit 2024, ndërsa për këtë rast ka pasur edhe arrestime dhe aktakuzë të ngritur ndaj personave të përfshirë.

Ky grup funksiononte përmes aplikacionit “Telegram”, ku shpërndaheshin fotografi dhe numra të telefonave me qëllim shqetësimi dhe ngacmimi seksual.

Autoritetet kanë siguruar qytetarët se janë duke e monitoruar situatën nga afër dhe do të ndërmarrin masa ndaj çdo përpjekjeje për krijimin e grupeve të ngjashme