Shtyhet sërish zgjedhja e rektorit në Universitetin “Ukshin Hoti” në Prizren, transmeton Gazeta e Prizrenit.
Bedri Muhadri, kryetari i Këshillit Drejtues, konfirmoi se votimi nuk është kryer pasi shumica e anëtarëve kanë udhëtuar zyrtarisht jashtë vendit.
Ai ka thënë se kjo çështje është shtyrë për javën e ardhshme.
Përpos Prof. Dr. Ismet Temajt, që aktualisht është ushtrues detyre i Rektorit, në konkurrencë për këtë pozitë janë edhe Prof. Dr. Kadri kryeziu, Prof. Dr. Naser Pajaziti, Prof. Dr.Bekim Berisha, si dhe Prof.Dr. Hamdi Hoti.
Rektori parashihej të zgjedhej të hënën, por kjo u shty për sot.
Statuti i UPZ-së parasheh që rektori të zgjedhet me 2/3 e votave të nevojshme.
Në maj të vitit të kaluar Ismet Temaj ishte zgjedhur për Rektor, por mbledhja në të cilën ishte bërë zgjedhja e tij u kontestua, për shkak të mungesës së kuorumit të KD dhe çështja kaloi në Gjykatën Themelore të Prizrenit. Në dhjetor 2018, KD i këtij institucioni ka anuluar vendimin e datës 22.05.2018 për zgjedhjen e rektorit, duke zgjedhur Temajn si ushtrues detyre.
UPZ është themeluar në vitin 2010, ndërsa ka rreth 10 mijë studentë. Pas rektorit ndërkombëtar themelues, këtë detyrë deri më tash e kanë kryer disa rektorë dhe ushtrues detyre. I fundit në këtë pozitë ishte Prof. Dr. Ramë Vataj./GazetaePrizrenit.net/
