PDK në Prizren ka shprehur solidarizimin e saj me popullin e Shqipërisë, pas tërmetit, ndërsa ka njoftuar edhe për pezullimin e aktivitetit politik, duke theksuar se të gjithë energjinë e saj, do ta orientojë për solidarizim me gjendjen aktuale në Shqipëri.

Ky subjekt përmes një telegrami ngushëllues ka shprehur ngushëllime për të gjithë familjet e viktimave.

“Me keqardhje morëm lajmin e hidhur, lidhur me tërmetet e njëpasnjëshme të përmasave shkatërruese, që po ndodhin sot në Shqipëri.

Goditjet e fuqishme të tërmeteve, të cilat po ndodhin, kanë krijuar pasoja të rënda dhe fatkeqësisht kemi edhe jetë të humbura.

Është një moment dramatik, ku gjithsesi, duhet ruajtur qetësinë dhe të qëndrojmë pranë njëri-tjetrit dhe ta përballojmë këtë goditje së bashku.
Solidarizohemi me popullin Shqiptar dhe u shprehim ngushëllime vëllazërore, familjeve të viktimave.

Do të jemi të gatshëm për çfarëdo që e kërkon situata dhe nevoja, për të dhënë kontributin tonë, për të zbutur sado pak, pasojat e goditjeve të përmasave, që nuk kishim mundur as t’i imagjinojmë dot”. /GazetaePrizrenit.net/