Në Kosovë dhe në të gjitha trevat shqiptare, sot shënohet 7 Marsi – Dita e Mësuesit, e cila është një ngjarje me rëndësi arsimore dhe kulturore, ku të gjithë kujtojnë mësuesit e parë të shkronjave shqipe.
Më 7 mars 1887 në Korçë u hap mësonjëtorja e parë shqipe. Mësues dhe drejtori i parë i saj ishte Pandeli Sotiri.Kjo ngjarje ishte një fitore për popullin shqiptar, pasi deri në atë kohë mësimet mbaheshin në shtëpi private dhe në mënyrë të fshehtë. Kjo shkollë qëndroi e hapur për 15 vjet. Drejtues të saj ishin figura të njohura të Rilindjes shqiptare si: Pandeli Sotiri, Petro Nini Luarasi, Nuçi Naçi, Thoma Avrami, e të tjerë.
Objekti i shkollës në Korçë është një nga pikat më të vizituara në Shqipëri.
Për nder të kësaj ditë, sot në Kosovë mbahen aktivitete të shumta, të organizuara nga SBASHK-u, komunat, shkollat dhe institucione tjera.
Ndërkaq në kontekstin e shënimit të kësaj dite, në Prizren u nderuan me mirënjohje 67 mësimdhënës të pensionuar gjatë këtij viti shkollor.
Ata kanë kontribuuar me dekada, ndërsa janë nderuar me mirënjohje nga Drejtoria e Arsimit.
