Edhe sot të gjitha rezultatet e testeve për COVID-19 të qytetarëve të Malishevës kanë rezultuar negative, duke e ruajtur stabilitetin e situatës me koronavirus në këtë komunë.

Rezultatet e testeve për ditën e sotme janë konfirmuar nga Instituti Kombëtar i Shëndetësisë Publike të Kosovës, në komunikimin zyrtar me Shtabin komunal emergjent që merret me menaxhimin e situatës me koronavirus në Malishevë.

Nënkryetari i Malishevës, Hajdin Berisha, në emër të shtabit komunal, ka konfirmuar lajmin se të gjitha analizat e testeve për ditën e sotme kanë rezultuar negative.

“Edhe sot në ditën e katërt nuk kemi asnjë rast të prekur me COVID-19, kurse numri i rasteve aktive është 12”, tha Berisha.

Shtabi komunal emergjent vazhdon të kërkojë nga të gjithë qytetarët që t’i respektojnë masat dhe udhëzimet për t’u mbrojtur nga COVID-19, pasi kjo është mundësia e vetme dhe mënyra e vetme e mbrojtjes dhe mos përhapjes së virusit.

Ndryshe, në Komunën e Malishevës janë 94 raste me COVID-19, prej tyre 78 të shëruar, 4 të vdekur dhe 12 raste janë ende aktive.