Më 20 gusht 2025, rreth orës 20:30, njësitë hetimore të Policisë së Kosovës nga Departamenti i Kufirit zbuluan një rast të dyshuar të trafikut të drogës përgjatë vijës së gjelbër me Shqipërinë.

Gjatë operacionit në terren, Policia hasi një person të armatosur, i cili mbante një çantë me vete. Sapo vuri re praninë e zyrtarëve, ai drejtoi armën ndaj tyre, duke krijuar një kërcënim të drejtpërdrejtë për jetën e tyre.

Pavarësisht se policët u identifikuan dhe i kërkuan të ndalej, i dyshuari braktisi çantën dhe u arratis në drejtim të zonës malore në territorin e Shqipërisë.

Pas kontrollit të çantës, Njësia e Antidrogës konstatoi se brenda saj ndodheshin rreth 21 kilogramë marihuanë.

Policia ka nisur hetimet për identifikimin dhe arrestimin e personit të dyshuar, ndërsa rasti është cilësuar si tentativë për trafikim të lëndëve narkotike dhe sulm ndaj zyrtarëve policorë./Albanian Post