Përmes opinionit të shprehur, kjo agjenci ka pohuar se në këtë aktivitet të prokurimit ka kërkesa nga autoriteti kontraktues që nuk janë në pajtim me Ligjin e prokurimit publik, shkruan sot Koha Ditore.

“AKK-ja ofron këtë opinion, me të cilin kërkohet nga ju si Autoritet kontraktues që t’i ndërmerrni të gjitha veprimet e nevojshme drejt evitimit të shkeljeve të evidentuara, lidhur me tenderin ‘Furnizim me 6 kompjuterë laptopë dhe 7 smartphone’…, në mënyrë që të respektohen dispozitat përkatëse të Ligjit të prokurimit publik…”, thuhet në opinionin e AKK-së.

AKK-ja ka sqaruar se në bazë të dokumenteve të nxjerra nga sistemi elektronik i prokurimit ka analizuar njoftimin për kontratë dhe dosjen e tenderit, ku ka konstatuar se UPZ-ja për këtë aktivitet të prokurimit ka paraparë procedurën e kuotimit të çmimit, kontratë publike të llojit furnizim, me vlerë të vogël në shumë prej 9 mijë e 900 eurove.