Vdes një grua, arrestohen dy mjekë në Malishevë
Policia e Kosovës dje ka arrestuar dy mjekë pasi dyshohet se kanë kryer veprën “trajtim i pandërgjegjshëm mjekësor”.
Kështu, si pasojë ka vdekur një grua, derisa të dyshuarit me vendim të prokurorit janë dërguar në mbajtje.
TRAJTIM I PANDËRGJEGJSHËM MJEKËSOR
Malishevë 22.08.2023-13:00. Lidhur me rastin janë arrestuar dy persona të dyshuar një femër dhe një mashkull kosovarë, të cilët dyshohet se kanë kryer veprën e lartcekur ndaj viktimës femër kosovare e cila ka ndërruar jetë. Të dyshuarit me vendim të prokurorit janë dërguar në mbajtje”, thuhet në njoftimin e policisë.
Siç raportonte Koha dje, një grua rreth 35 vjeç është paraqitur për ta hequr një dhëmb në një klinikë në Malishevë, por iu është komplikuar gjendja shëndetësore për çka është dërguar në QKUK.
Drejtori i Qendrës Emergjente në QKUK, Naser Syla, e ka konfirmuar se viktima është dërguar pa shenja jete në QKUK.
“Po, është sjellë te ne në Qendrën Emergjente nga Malisheva, por edhe përkundër të gjitha masave të ndërmarra të CPR, është konstatuar vdekja. Është sjellë pa shenja jete”, ka thënë ai.
