17-05-2022

AAK e PSD paralajmërojnë protestë për çmimin e rrymës

Shefi i Grupit Parlamentar të AAK-së, Besnik Tahiri ka paralajmëruar protesta lidhur me rritjen e tarifës së energjisë elektrike.

Tahiri tha se do të mundohen me çdo mjet ta pengojnë këtë rritje.

“Nuk ka shanse teorike, AAK me i pranu këto tarifa. Ne do të organizojmë protesta, është mjet demokratik. Do të organizohemi në cdo formë me pengu këtë”, tha Tahiri.

Edhe kryetari i PSD-së, Dardan Molliqaj, njoftoi se do të organizojnë protestë në lidhje me rritjen e çmimit të energjisë.

Sipas tij, kjo protestë do të organizohet para datës 29 janar, kur edhe është paraparë të merret vendimi për rritjen e çmimit të rrymës.

“Ne kemi pasur disa aksione, tri deri tani, nesër kemi mbledhje të kryesisë, ku do të diskutojmë për protestën, jemi duke e konsideruar seriozisht organizimin e protestës, para datës 29… Që do të ketë PSD-ja protestë, nuk ka dilemë”, ka thënë Molliqaj në Klan.

Ai tha se do të ishte mirë që KEDS-i të nacionalizohej, pasi edhe kështu shpenzimet po janë të mëdha për qytetarët. Molliqaj tha se zgjidhje për të dalë nga kriza do të ishte edhe përdorimi i energjisë së ripërtritshme si dhe të merrej më seriozoisht çështja e gazit.

“Nuk ka kësi rasti që një kompani private e vendos një procent që krejt fitimet ka me i marrë për vete, e kur ka krizë shteti ia mbulon humbjet. Unë kisha pasë qejf me e pasë një këso kompanie… Duke e ditur që situata të tilla edhe mund të na përsëriten, do të ishte mirë me liberalizu energjinë e ripërtritshme, që një vjet e kanë blloku… nën dy me konsideru seriozisht çështjen e  gazit, dhe e treta ish dashtë me nacionalizu KEDS-in”, ka shtuar ai.

Kujtojmë se partitë opozitare nuk e kanë përkrahur këtë propozim të ZRrE-së për rritjen e tarifës së energjisë. Lidhur me këtë, do të mbahet nesër një seancë, ku LDK-ja ka thënë se do ta kundërshtojnë këtë paralajmërim skandaloz të Qeverisë.

Asnjë koment

Comments are closed.