Gjykata Themelore në Gjakovë, dega në Malishevë, e ka dënuar me 400 euro gjobë, të akuzuarin për posedim të paautorizuar të narkotikëve, Adem Mazreku.

Ndaj tij, gjithashtu është shqiptuar edhe dënimi plotësues, konfiskimi i narkotikut, i llojit marihuanë, raporton “Betimi për Drejtësi”.

I akuzuari Mazreku është ngarkuar edhe me pagesën e paushallit gjyqësor në shumë prej 20 euro, dhe 20 euro për taksën për kompensim të viktimave të krimit.

Në seancën e shqyrtimit fillestar, të mbajtur më 21 qershor 2019, i akuzuari është deklaruar fajtor për veprën penale me të cilën ngarkohet, duke shprehur keqardhje dhe duke premtuar që nuk do ta përsërit më një vepër të tillë.

Pranimin e fajësisë nuk e ka kundërshtuar prokurori Anton Hasanaj, e më pas e ka aprovuar edhe gjykatësi Njazi Morina.

Ndryshe, Prokuroria Themelore në Gjakovë, ka ngritur aktakuzë më 31 tetor 2018, ndaj Adem Mazrekut, me pretendimin se ka kryer veprën penale “posedim i paautorizuar i narkotikëve, substancave psikotrope ose analoge”, nga neni 275, paragraf 2, të KPRK–së.

Sipas aktakuzës, i akuzuari Adem Mazreku, më 19 korrik 2018, në Malishevë, në rrugën “Ibrahim Mazreku, pa autorizim posedon substanca psikotrope ose analoge, të llojit “marihuanë”, të shpallura të rrezikshme sipas nenit 9 dhe nenit 17 të Ligjit për barnat narkotike, substanca psikotrope dhe prekusorë.

Në aktakuzë thuhet se gjatë një kontrolli policor, në afërsi të të akuzuarit Mazreku, në tokë është gjetur e gjuajtur një cigare e mbushur me substancë në formë bari, e dyshuar për narkotikë të llojit “marihuanë”.

Gjithnjë sipas aktakuzës, po ashtu në xhepin e xhaketës së të akuzuarit janë gjetur mbetje të substancës narkotike në formë bari, me ngjyrë të gjelbër, e dyshuar për narkotikë të llojit “marihuanë”, me peshë neto 0.65± 0.0001 gram, e cila substancë më pas sekuestrohet nga policia. /BetimipërDrejtësi