Gjykata Speciale po heton për pagesa të avokatëve mbrojtës edhe Zyrën e Driton Lajçit

Por, sipas avokatit të tij, Artan Qerkini, ai aty kishte qëndruar si përkthyes ndërmjet Lushtakut dhe avokatit Geoffrey Nice, raporton KTV.

Për pozitën e Lajçit, Qerkini thotë se ishin në njohuri Prokuroria e Specializuar, dhe një situatë tillë ishte krijuar pasi avokati Nice, nuk kishte pranuar përkthyes nga Prokuroria.

E përderisa e ka mohuar mundësinë që Lajçi të jetë ftuar për këtë çështje, Qerkini ka bërë të ditur se Prokuroria e Specializuar, përveç funksionit të zyrës, ka pasur dyshime për disa pagesa që janë bërë për mbrojtjen e personave potencialisht të akuzuar.

Por, Qeveria e Kosovës, konkretisht Zyra të cilën e udhëheq Lajçi, nuk ka të drejtë të bëjë asnjë pagesë në këtë fazë bazuar në Ligjin për mbrojtjen juridike dhe mbështetjen financiare për personat e akuzuar potencial pranë Dhomave të Specializuara.

I gjithë ky ligj, veçanërisht neni 3, specifikon se për asistencë në mbulimin e shpenzimeve të mbrojtjes, kanë të drejtë të gjithë personat e akuzuar, pra pasi të ngrihet aktakuza, e jo në fazën e hetimeve ose marrjes në pyetje.

Në fillim të vitit, Driton Lajçi e kishte pranuar në një deklarim për T7, se kanë marrë kërkesë për të paguar avokatin Geoffrey Nice, ani pse Sami Lushtaku as tani e as në janar nuk ishte i akuzuar, por vetëm i dyshuar i Speciales.

Për hetimet në këtë çështje, as zëdhënësi i Prokurorisë së Specializuar, Christopher Bennett, nuk ka dhënë ndonjë koment.

KTV-ja ka dërguar javën e kaluar kërkesa për qasje në dokumente zyrtare për këto pagesa, në drejtim të Ministrisë së Drejtësisë dhe Zyrës së Kryeministrit, por ende nuk ka marrë përgjigje.

Lajçi u intervistua javën e kaluar, derisa paraprakisht, edhe një zyrtar nga zyra që udhëheq ai, u mor në pyetje nga hetuesit e Speciales.

Rilind Berisha, në muajin gusht ishte ftuar për intervistim, derisa në media është raportuar se ai dyshohej për rrjedhje të informatave nga zyra ku punonte.

Përveç Berishës e Lajçit, siç është bërë e ditur tashmë, ftesa për t’u paraqitur në Hagë para prokurorëve të Prokurorisë së Specializuar, i ka shkuar edhe ministrit të Drejtësisë, Abelard Tahiri.