Kapet një nga prizrenasit e shumëkërkuar nga Policia
Është arrestuar Egzon Reshani, pasi tentoi të largohej në drejtim të Serbisë.
Sipas njoftimit të Policisë së Kosovës, arrestimi ka ndodhur më 3 gusht pak pas orës 22:00, kur zyrtarët e Policisë Kufitare, gjatë patrullimit dhe mbikëqyrjes së vijës kufitare në zonën e fshatit Karaqevë e Poshtme, kanë identifikuar një automjet të dyshimtë që po lëvizte nga drejtimi i fshatit Breznicë në Serbi drejt territorit të Republikës së Kosovës.
Policia ka reaguar menjëherë dhe ka arritur ta ndalojë dhe arrestojë të dyshuarin në afërsi të kufirit, duke parandaluar largimin e tij nga territori i Kosovës.
Ndaj Egzon Reshanit, sipas Policisë, ka pasur urdhërarrest aktiv, pasi kërkohej nga organet e drejtësisë për disa vepra të rënda penale, përfshirë “Vrasje në tentativë”, “Fajde”, “Privim i kundërligjshëm i lirisë” dhe “Detyrim”.
Gjatë kontrollit të të arrestuarit, policia ka gjetur dhe sekuestruar edhe një thikë. Për këtë rast, pas konsultimit me prokurorin kompetent, është iniciuar procedurë për veprën penale “Armëmbajtje pa leje”.
Pas përfundimit të procedurave nga Policia Kufitare, i dyshuari i është dorëzuar njësive kompetente të Drejtorisë Rajonale të Policisë në Prizren, për veprime të mëtejme sipas urdhërarrestit dhe rasteve për të cilat kërkohej.
Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.
