Kryekëshilltari i presidentit turk për Ballkanin, shqiptari Sabri Demiri, ka thënë se Turqia është ndër shtetet e para që ka garantuar për lirimin e ish-presidentit Hashim Thaçi nga Haga.

Ai ka shtuar se në rast se gjykata vendosë që Thaçi të gjykohet në liri, në këtë rast ish-kreu i UÇK-së do të qëndronte si mysafir në Turqi.

“Qëndrimi i Turqisë ka qenë çdo herë kundër akuzimit të liderëve të zgjedhur nga populli me zgjedhje demokratike. Mirëpo edhe pse tash nuk mund të përzihemi gjatë procesit gjyqësor. Ne si Turqi kemi dërguar edhe garanci në Hagë që në qoftë se caktohet një vendim që gjyqi të vazhdojë në liri, Thaçin mund ta kemi mysafir në Turqi”, tha ai për Klan Kosova.

“Ishin disa shtete që kishin shprehur këtë dëshirë dhe ne ishim të parët. Kemi filluar me ministrinë e Drejtësisë së Turqisë dhe Ministrinë e Jashtme. Jemi të parët si shtet që kemi shprehur këtë dëshirë”.

Ai ka folur në lidhje me dronët Bajraktar.

Ai tha se ka shumë kërkesa për këta dronë, si nga ana e Kosovës, ashtu edhe e shteteve të tjera.

“Sa jam i informuar, mendoj qe ka pasur kërkesa edhe nga ana e Kosovës, edhe nga ana e Serbisë, edhe nga ana e Bosnjës dhe Maqedonisë. Të gjithë shtetet kanë kërkuar dronë. Mirëpo për shkak të kërkesave dhe porosive të hershme gjatë kohë, është i pamundur dorëzimi momentalisht i Kosovës, Serbisë apo edhe shteteve të tjera, sepse janë në rend që presin të porosisin këta dronë, por nuk mund të marrin porosi për shkak se janë shumë të angazhuar dhe nuk mund të arrijnë t’i prodhojnë të gjithë Bajraktarët momentalisht”,tha ai.